網紅的藏寶箱我嘅職業係：新娘（上）
窗外，放炮仗嘅聲音震耳欲聾。
呢個係我嘅洞房花燭夜，但我已經唔記得，呢次係我第幾次婚禮，第十次？第十五次？
我叫彩彩，係一個全職新娘。
畢業後，我就同男友阿鋒一齊「做生意」，佢扮成人販子，我就扮成被拐賣嘅女大學生。
阿鋒帶我去鄉下，專門揀啲男多女少嘅村莊，將我「賣」畀鄉下人做老婆。
去到結婚嗰晚，阿鋒收足錢，再將新房中嘅我救出嚟，去另一個村莊。
其實我唔係咩大學生，只係中學嗰陣鍾意睇書，學咗幾句文皺皺嘅說話，可以用嚟呃鄉下人。
後來，我開始同阿鋒拍拖，好快就輟咗學，搬出去同佢同居。
我哋一心想為將來打拚，但既冇學歷又冇技能，仲唔捱得苦，生活愈嚟愈艱難，先開始做呢行。
每一次，阿鋒都同買家講，話我係女大學生，又係黃花閨女，家教好嚴，要買家擺酒後先洞房。
否則，以我剛烈嘅性格，好可能會自殺。
阿鋒仲會「偷偷地」話畀買家知，佢曾經想侵犯我，點知我寧死不屈，差啲自殺死咗。
「我都俾人拐咗，嫁邊個就身不由己，但我都有尊嚴㗎，一定要名媒正娶！」我扮到既貞烈又無奈：「正正經經擺酒結婚，之後咪安心做人老婆囉……女人遲早都要嫁。」
雖然買家通常都會同意，但我一個女人，俾人當貨物咁賣嚟賣去，點都會受啲苦、俾人佔下便宜。
輾轉去咗好多個村莊，我哋呃咗一大筆錢。
我開始厭倦呢種顛沛流離，不斷呃人嘅生活。
我同阿鋒講，不如我哋收手啦，搵個地方做吓正經生意，就算唔大富大貴，至少安安穩穩。
阿鋒猶豫不決，呢個時候，我發現我有咗阿鋒嘅BB，我個心更加渴望安穩。
阿鋒勸我：「呢個買家好想搵個女大學生做新抱，話生出嚟嘅細路會聰明啲，所以佢出價好高。」
「你係咪痴線㗎？我係大肚婆嚟，點扮黃花閨女啊？」我難以置信。
「咁依加都未見肚，著住衫唔覺嘅……」
阿鋒信誓旦旦：「呢次係最後一次，做埋呢次，我哋就收山，結婚養仔做小生意，咩都你話事。」
嫁雞隨雞，我冇辦法，只好跟住阿鋒，去咗個新買家屋企。
新買家叫大牛，人如其名，好似牛一樣咁粗獷。
大牛傻愣愣咁望住我：「呢個，會係我老婆？」
「就係佢啦。」阿鋒好熱情咁答。
「我點解咁好命，會有個咁靚嘅老婆？」大牛連嘴唇都震埋。
我唔算生得好靚，阿鋒從來冇咁讚過我，我忍唔住有啲開心。
大牛好快就畀咗一半錢，按照慣例，畀訂金後，我就要住喺買家屋企。
買家儘快安排婚事，擺酒當晚，賣家會收埋剩低嗰一半錢。
以前，我喺買家屋企住嗰陣，就成日俾人打罵同抽水。
但呢一次，大牛對我好好，除咗唔比我離開之外，其他嘢都儘量滿足我嘅需求，
每日都親親熱熱咁問：「未來老婆，你今日食咩啊？」
大牛咁好，搞到我有啲愧疚。
更糟糕嘅係，婚禮前夕，大牛跌親腳，不得不將婚禮延後一個月。
大牛好抱歉咁同阿鋒講，婚禮要延後，不如佢早啲畀埋尾數，阿鋒就可以離開呢條村。
阿鋒仲要帶走我，點會同意呢？
阿鋒知我就嚟見肚，好驚件事會穿煲，就委婉咁同大牛講，不如佢退番訂金並且帶走我，下次再帶其他「貨物」畀大牛。
大牛唔願意，話佢真係好鍾意我，仲提出要加錢，幾乎用盡佢嘅積蓄。
喺金錢嘅誘惑下，阿鋒居然同意咗。
個肚一日比一日明顯，我提心吊膽咁住喺大牛屋企。
我真係好驚佢突然發現真相，不甘受騙，一怒之下斬死我。
所以，每日大牛送飯入房，我都努力遮掩我個肚。
但去到結婚嗰日，大牛個妹幫我換嫁衣，我多番推脫不果，俾佢見到我隆起嘅小腹。
下集：https://bit.ly/3cnT8sx
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #我嘅職業係新娘 #我嘅職業係
Search